U·IATTIMGIPAONI
SHILLONG: Ma·mong sorkarini ra·gatna miksongenggipa Uniform Civil Code (UCC)-ni bidingo tale ma·sichenggijade iani Bill-ko jegalsona man·kujawa ine Bristibar salo, a·dokni Chief Minister Conrad K Sangma talataniko on·angtaiaha.
Assembly-ni Autumn Session-o Mawhati-ni MLA Charles Marngar-ni UCC-ko jegalsona gita resolution-ko ra·china didianggipani bidingo Chief Minister, ia kattarangko aganchakaha.
UCC-ni bidingo dingtang dingtang dilgiparangni jajrengsoenganina an·tangni chakpaaniko parakatengon, dingtang dingtang jat aro toromrangni songdongenggipa a·songo UCC-ko ra·gatna proposal-ko ra·baaniara kraani ong·ja indiba iani Bill-ko nichenggija chanchichipmangmange jegalsoaianide Assembly-na kraani ong·jawa ine Sangma parakataha.
Iana skang, UCC-ko ra·gatani bidingo Mawhati-ni MLA, an·tangni jajrengchaksoenganiko parakatengon, ian chonchongipa jat aro toromni manderangna aro mongsongbate Meghalaya a·dok gita dakgipa biapo dingtang dingtang jat aro toromni bilrangko ra·sekani gita ong·gen ine parakataha.
Marngar-ni parakatani gitade, UCC-ko jegalsona gita Khasi Hills aro Jaintia Hills Autonomous District Council-rangode, summer session-ko ong·atani somoion resolution-ko pass ka·manahachim.
Assembly-o resolution-ko ra·china Marngar-ni didianio, TMC-ni MLA-rang chong·motan Charles Pyngrope, Miani D Shira aro Mukul Sangma baksana VPP-ni MLA Adelbert Nongrum, Heaving Stone Kharpran aro Congress dolni MLA sakgni, chong·motan Saleng Sangma aro Ronnie V Lyngdoh-ba chakpaaniko on·angaha.
“An·chingni daka rikani aro an·chingni niam retirangko saoba ba parliament-ba nisigalna miksonganirang donggenchimode an·ching Assembly-ni gita apsan ku·cholsan ong·e jegalsoiaigen aro darangba iani bidingo ma·sisretjachina,” ine Chief Minister aganskaaha.
UCC Bill-ni bidingo chanchichipmangmangachide Assembly-o resolution-ko pass ka·na gita kraani ong·jawa ineba Sangma aganaha.
