U·IATTIMGIPAONI
SHILLONG: Sukrobar salo, Meghalaya a·dokni Chief Minister Conrad K Sangma aro Voice of the People’s Party (VPP) MLA Ardent Miller Basaiawmoit-ni gisepo ding·chaoe jera ra·grikaniko Assembly-ni Autumn Session-o nikangna gita man·aha.
‘Meghalaya a·doko janggi tangani gadang namen tang·onbatsranggipa’ ingipa katta bichongni bidingo Nongkrem MLA-ni ra·bagipa chanchirimanina a·dokni Chief Minister Conrad K Sangma aganchakaniko on·angengon, Chief Minister-ni agangipa kattarangko jegalatenba, Chief Minister-ara ‘Sangma’-sa aro Deputy Chief Minister sakgniara Tynsong aro Dhar-sa ong·a ine Basaiawmoit aganaha.
Darang sorkarikon mande saksachide rikna man·ja aro ian apsan nangrime kam ka·anisa ong·a ine ua aganaha.
Iana skang, mitam membor-rang, apchone gisik chanchina nangja ineba Chief Minister aganahachim.
Uni iandakgipa kattarangko jegalatskaengon, ua an·tangni chanchianikosa Assembly-o aganengachim indiba Chief Minister Conrad Sangma, uni sing·anirangna aganchakgija katna jotton ka·enga ine Basaiawmoit aganaha.
Tribal-rang aro gipin a·dokrango dal·bagipa manderangni chanchianiode dingtanggrikani dongaia ineba VPP MLA aganaha.
“Chinga a·dokni nanganirangko aganengani gimin chinga apchone chanchia ine na·a aganengama?” ine Basaiawmoit, membor-rangni sing·anirangna aganchakaniko on·china Chief Minister-ko didiangaha.
Chief Minister, unbaksa jera ra·grikna nangnikenga ong·ode ua dingtang biapo, dingtang gadango jera ra·grikna man·aigen ineba Basaiawmoit aganaha.
Ja·mano Songsak-ni TMC MLA Mukul Sangma-ba chadenge, Chief Minister pangnan niamko ja·rikani bidingo aganronga indiba ia niamde pilaknan ong·a ine janapatenba, sing·anirangna aganchakengon, nangchakegipa minister-rang, nangchongmotana agrede aganna nangja ine parakatskaaha.
Assembly-o gital MLA-rangba donga aro uamangna ja·delgimin MLA-rangna name dakmesokna nanga ineba Sangma aganaha.
Iana skang, a·dokni Chief Minister Conrad Sangma, sing·anirangna aganchakaniko on·angengon, batanggimin bilsi bongani gisepo dingtang dingtang songni kilometer 2558 ramarangko tariaha aro ia bilsi bongani gisepo sorkari, gong kror 8000-na baten EAP-rangko man·aha ine parakataha.