U·IATTIMGIPAONI
SHILLONG: Gipin a·dokrangoni Meghalaya a·dokona aro mongsongbate a·dokni skotong Shillong songjinmaona re·baenggipa tourist taxi-rangko sorkari champengna bil dongja ine Sukrobar salo, a·dokni Deputy Chief Minister aro Transport Minister Sniawbhalang Dhar, Assembly-na parakataha.
Shillong songjinmao garirangni apchangket ong·aniko komiatna gita sorkari, gipin a·dokrangoni re·baenggipa tourist taxi-rangko champengna niamrangko ra·gatgenma ine Assembly-ni Autumn Session-o North Shillong-ni VPP MLA Adelbert Nongrum-ni sing·anina ua ia kattarangko aganaha.
Iani bidingo aganchakaniko on·angengon, tourist permit donggipa taxi-rangde India a·song gimikon re·rurana man·aiani gimin gipin a·dokrangoni re·baenggipa tourist taxi-rangko sorkari champengna bil dongja aro Shillong-ara gipin a·dokrangona dakanggipa ramaba ong·ani gimin re·ruraenggipa garirangko champengna man·jawa ine Dhar parakataha.
Deputy CM-ni parakatani gitade, All India Tourist Vehicle Permit-ni ning·o donggipa Terms & Conditions-ni Para 4-ni ning·oba tourist taxi-rangko champengna bil dongja.
Minggipin sing·anina aganchakaniko on·angskaengon, Shillong-o Taxi permit-ni niamrangko nambate tarina gita da·o permit on·aniko dontongatchengenga ine Transport Minister parakataha.
Shillong-o STPS bus garirangko galchipe donengani gimin sing·anina aganchakaniko on·angskaengon, ia garirangara jakkalna namjahani giminsa dingtang dingtang biaprango galchipe donenga ine Dhar parakataha.
