U·IATTIMGIPAONI
SHILLONG: Dingtang dingtang department-rangna ba dingtangmancha maiba project-rangna miksonganiosa sak 124 consultant ba agan-ku·pattitimgiparangko a·dok sorkari songaha ine Sukrobar salo, a·dokni Chief Minister Conrad K Sangma parakataha.
Sorkarini songe on·gipa consultant-rangni bidingo Ampati-ni TMC MLA Miani D Shira-ni Assembly-o sing·anina Chief Minister, ia kattarangko parakataha.
Ia bilsini gisepo gong kror 22.56 tangkarangko sorkarini songgipa pilak consultant-rangna gamaha ine janapatengon, sak 59 consultant-rangkode dingtangmancha Externally Aided Project (EAP)-rangna sorkari songaha ine Chief Minister parakataha.
Sak 124 consultant-rangoni sak 59 consultant-rangko EAP-rangna songaha ong·ode sak 65 consultant-rangko mai project-rangna songskaaha ineba Shira sing·doangaha.
Iani bidingo talataniko on·angskaengon, ia consultant-rangara technical expert-rangsa ong·a aro uamangko dingtangmancha uamangni ma·sigipa kamrangnasa rimbaaha ine Sangma parakataha.
Ia consultant-rangara an·tangtangni kamrango u·i-ma·sigipa manderang ong·a ine talataniko on·angengon, uamangko ma·mong sorkarini ra·gatgipa scheme-rangna aro EAP-rangna nangani gimin songaha ine Chief Minister parakataha.
“Ia category minggnion, dingtang dingtang department-ni dongimin niamrango pangchake uamang kamrangko ka·na nanga. Kamrangko ta·rakbate aro nambate chu·sokatna nangnikani giminsa chinga uamangni changa sapanirangko jakkalna nanga,” ine Sangma aganaha.
Unity minggipa project, jenan a·songni Prime Minister, a·dok ge·antinan tangka paisarangko on·engachim ia project-ni ning·o Meghalaya a·dokna gong kror 132-ko chamataha aro a·song gimiko a·dok damgittamsan jadokni gisepo iako chu·sokatna man·aha ineba Chief Minister parakataha.
“Ia pilakan chingko expert-rang donge ku·pattianirangko on·engani giminsa ong·aha aro uamangni a·selsa chinga somoi gita proposal-rangko on·e tangka paisarangko somoi gita man·aha,” ine ua aganaha.
