U·IATTIMGIPAONI
AMPATI: Meghalaya a·doko ta·makku jakkalaniko champengna gita sorkari rakbate ja·kurangko de·engon, Sukrobar salo South West Garo Hills a·jani Police-rang, Health department baksa nangrime, skul sepangrango ta·makku palenggipa dokkanrangni kosako niam gita ja·kurangko de·angaha.
Adita salrangna skangsan, Cigarettes & Other Tobacco Products Act (COTPA)-ni ning·o, South West Garo Hills a·jani Police-rang aro official-rangna National Tobacco Control Program (NTCP) aro Sambangh Health Foundation (SHF)-ni gita training-rangko on·e, ta·makkurangko warachakna gita ku·mikchetanirangkoba dakatahachim ine nikna man·a.
Meghalaya a·doko bilsiantian sak 8000 manderang, ta·makkurangko jakkalani a·sel siangna gita nangengani gimin South West Garo Hills a·jani Superintendent of Police (SP), suk ong·gijaniko parakatenba, West Garo Hills a·jao COTPA-ko bilakbate jakkalchina didiataha.
Uandaken Sukrobar salo, South West Garo Hills a·jani police-rang, Health department-ni official-rang baksa skulrangoni metre 100-ni ning·o ta·makku palenggipa dokkanrangko sandienba, dairangko gamataha aro mikrakatanirangkoba on·angaha.
“Je biaprangon COTPA-ni niamrangko pe·genchim, uandakgipa biaprango rakgipa dairangko ra·china pilak police station-ni officer-in-charge-rangna ge·etaniko on·manaha aro police-rang, skulrangoni metre 100-ni ning·o ta·makku palaniko bilakbate champenganggen,” ine SP parakataha.
Indake ong·engon, COTPA Section 4-o pangchake pilak nangchongmotgipa biaprango aro police station damprakni a·palon ‘No Smoking’ chinrangko dongen ineba SP parakataha.