U·IATTIMGIPAONI
TURA: Re·anggipa Sonibar salo, South Garo Hills a·jani Gasuapara jolo donggipa dingtang dingtang dolrangni nangrime bikotgipa Joint Action Committee (JAC), Gasuapara block-ni ning·o donggipa a·king nokmarang, butchuma budeparang aro songko nokko dilenggipa manderang baksa tom·aniko ong·atangenba, Gasuapara block-ko gital civil sub-division songchina dabiani bidingo chanchirimangaha.
Ia tom·aniko ong·atani bidingo kobor ra·timgiparangna parakatengon, Gasuapara block jolrangara, South Garo Hills a·ja gimiko mande jelbatsranggipa ong·an baksana area namen dal·a aro manderangni nangchongmota kamrangna mitamrangde Baghmara-ona re·a doanio neng·nikanirangko man·na nangengani gimin Gasuapara-ko gital civil sub-division songchina dabina gita ia tom·anio jinma tik ka·angaha ine JAC-ni dilgiparang parakataha.
“Gasuapara block-ko civil sub-division songgenchimode ian jolni manderangna dakchakbeani ong·gen ine nikenba chinga da·alo iako sorkario dabina tik ka·angaha,” ine JAC-ni dilgiparang parakataha.
Gasuapara higher secondary skulko da·alona kingkingan songni manderang an·tangtangsa chalaina nangengani a·sel skulo skie on·enggiparang aro chatro chatrirangba neng·nikanirangko chagrongna nangtokengani gimin ia skulko sorkari chu·gimik jako ra·e chalaichina dabina gitaba ia tom·anio jinma chanchirimangaha ineba JAC-ni dilgiparang parakataha.
“Gasuapara jolo donggipa bang·a bi·sarangan kangal cholgrirangsa ong·pae, town-jillarangona re·ange poraipana chol ong·ja aro ia skulon donge poraina nangao ga·akenga indiba ia skulara private skulsa ong·e skigiparangba aro poraienggipa bi·sarangba neng·nikanirangko chagrongna nangtokengani gimin ia skulko sorkari chu·gimik jako ra·e chalaichina chinga nangnikenga,” ine JAC-ni dilgiparang parakataha.