U·IATTIMGIPAONI
TURA: Mineral Resources Directorate-ni auction order-ko on·anio, dakkina parakatgimin koelarangni bidingo chanchichipna kraani ong·engani gimin dingtang dingtang koela a·damrango dakkie galna gita bikote donenggipa koelarangko hisapna spot inquiry-ko dakchina gita Rongara-Siju constituency-ni gitcham MLA Rophul S Marak baksana sakgipin social activist Kingstone Bolwari, gitcham Judge Justice Katakey-na sedoataha.
Adita salrangna skang, Mineral Resources Directorate-ni auction order-o janapatani gitade, Nongalbibra jolo dakkina gita bikotgimin koelarangoni metric ton 2402-de Tharamol Sangma-ni, MT 5212-de Holybirth Sangma-ni, MT 3851-de Pedindro M Sangma-ni ong·achim indiba order-o janapgipa sak 10 koela nokgiparang badita koelarang donga, ukode janapskajahachim.
“Dakkina parakatgipa koelarangni bidingo chinga South Garo Hills a·jani manderang bebera·na man·tokjaenga aro mitam manderangni badi ka·doangani gitade, ia koela nokgiparangni a·kangenggipana baten koelarang donga,” ine Justice Katakey-na sedoatgipa chittio gitcham MLA aro Kingstone Bolwary parakataha.