U·IATTIMGIPAONI
TURA: South Garo Hills a·jani Chokpot Sub-Division aro Baghmara Sub-Division-ni ning·o donggipa mitam songrango, Jal Jeevan Mission (JJM)-ni kamrangko name ka·ja ine Garoland State Movement Committee (GSMC) Southern Zone (SZ) matnangatenba, iani bidingo South Garo Hills a·jani Deputy Commissioner-na badi ka·e sedoataha.
GSMC SZ-ni parakatani gitade, Chokpot Sub-Division aro Baghmara Sub-Division-ni ning·o donggipa dingtang dingtang songrango JJM-ni kamrangko name ka·ja ine manderangni badi ka·anirangko man·soani ja·man GSMC-ni dilgiparang, ia songrangona re·ange nion, kamrangko name ka·bebeja ine nikna man·ahachim.
“Chingni ia songrangona re·ange nikeani gitade JJM kamrangko niam gita chu·sokatjaha aro haida ia kamko ka·gipa contractor-rang, bill-ko oke cha·namangmangsa kamrangko ka·aiahakon,” ine GSMC SZ-ni dilgiparang parakataha.
Iani bidingo ta·raken inquiry-ko dakchina aro contractor-rangni kosako rakgipa ja·kurangko de·china gitaba GSMC SZ, South Garo Hills a·jani DC-ko didiataha.
