U·IATTIMGIPAONI
SHILLONG: A·dok Sorkari mikkang academic session-onin Shillong Engineering College (SEC)-o class-rangko a·bachengatna gita chanchienga.
“Nokrik-nokdakanirang matchota baktapan, class-rangko seng·gnang a·bachengatna man·na gita chinga tom·e chanchirimanirangko dakanggen. Mikkang academic session-ko a·bachengatna man·genma man·jawa nichenggen aro nigrikenba mikkang academic session-ko a·bachengatna nigen,” Minister in-charge Education, Rakkam A Sangma Mongolbaro aganaha.
A·dok Sorkari, All India Council for Technical Education (AICTE)-ni ra·chakaniko man·kujani gimin ia bilsiode Shillong Engineering College-ni skanggipa academic session-nade chatro chatrirangko man·sokujanaba donga.
Unaskang, saksa sorkari official indake aganachim je, College-o dingtang dingtang post-rangko a·bachengatahachim indiba roster system-ni a·sel recruitment-ko dakanio ja·donggaatako man·aha. Indakoba mingsa special recruitment drive-ko dakenba sorkari, teaching aro non-teaching staff-rangko rakkina jotton ka·enga ine official aganaha.
Ia engineering college-ko Chief Minister Conrad K. Sangma re·anggipa January 16 tarikon oprake on·manahachim.
Ia college-ko Mawlai Kynton Massar-o donggipa Shillong Polytechnic compound-o 7.8 acre mang a·o rikaha.
College-o minggittam engineering degree course-rang donggen jedake civil, electrical aro mining, jeon branch ge·prako sak 30 chatro-chatrirang poraina man·gen.
Unomitingo A·doko CUET centre-rangko kulidapani bidingo aganengon, “Chinga kamrangko ka·enga aro chingni mol·molanirangko India Sorkari knachakgen. Da·o dipet chingo centre ge·gittamsan dongaia aro nangdapkugen,” Sangma aganaha.