U·IATTIMGIPAONI
SHILLONG: Dingtang dingtang department-rango ka·gualgipa aro olgrokgipa kamrangni bidingo Comptroller & Audit General (CAG)-ni parakatani ja·man, ia ka·gualgipa aro olgrokenggipa kamrangko namdapatna gita sorkari gisik nangbate kam ka·gen ine Budbar salo, Meghalaya Democratic Alliance (MDA) sorkarini ku·wattimgipa Paul Lyngdoh, ku·rachakaniko on·ataha.
CAG-ni report-rango parakgipa kattarangni gimin aganchakaniko on·angengon, CAG report-rangko pangnan sorkari name nipilronga aro ua an·tangan Public Accounts Committee (PAC)-ni membor aro chairman ong·manahani gimin iako ua bil gnangen jako ra·anggen ine Lyngdoh parakataha.
Je department-rangon dakgualanirangko CAG-ni report-o parakahachim, uandakgipa department-ni kamrangko namdapatna gita sorkari, gisik nangbate kamko ka·gen ineba a·dokni Cabinet Minister parakataha.
Ia bilsini CAG report-ara batanggimin sorkarini chu·sokgijanirangkosa parakaha aro gitcham sorkariode ua an·tang maming bak dongjani gimin ia kamrango ua an·tangde jak dongja ineba Lyngdoh talataniko on·angaha.
CAG-ni report-o parakatani gitade, name chanchisamsoe kamrangko ka·jahani a·sel aro private company-rangna tangka paisarangko indinari koros ka·ahani a·sel batanggimin adita bilsirangni gisepo a·dok sorkari, gong kror 170-na baten manderangni tangkarangko bon·atahachim.
