U·IATTIMGIPAONI
SHILLONG: Greater Shillong Water Supply Scheme (GSWSS)-ni phase III-ko matchotatna gita Public Health Engineering (PHE) department, gong kror 66 tangkarangko nangdapkuenga ine a·dokni PHE Minister Marcuise N Marak parakataha.
Ia GSWSS-ni phase III-na 2008 bilsini October jaode gong kror 193.50-ko hisapahachim aro da·o ia scheme-ko matchotna gita somoiko name aganna man·kujaengoba korosde gong kror 300-mang gapangskaengahachim.
Indake ong·engon, ia GSWSS-ni phase III-ko December ja bon·angachibara matchotatna gita PHE department, gong kror 66 tangkarangko bi·dapenga ine a·dokni PHE Minister parakataha.
Marak-ni parakatani gitade, dingtang dingtang a·selrang jekai, ma·mongoni tangka paisarangko dake daka watatani, PWD, Forest department aro Shillong Cantonment Board-ni permission-rangko on·anio ru·utahani a·selsa ia GSWSS-ni phase-III ja·manchakatako man·na nangahachim.
Indake ong·genchimoba, GSWSS phase III-ni package II-o pump-rangko rikna gita Hima Mawphlang-ni a·a nokgiparang PHE department-na NOC-rangko on·ningjahani a·selsa ia project-ko a·bachengataoni bilsi 15-ni ja·manba matchotna gita man·kujaenga.
Indake ong·engon, mikkang antiode PHE department, Hima Mawphlang baksa meligrikgijanirangko namatna man·gnok aro ia project-ko ia bilsini December jaon matchotatna man·gnok ine PHE Minister, an·tangni ka·dongchakenganiko parakataha.
