U·IATTIMGIPAONI
BAGHMARA: Meghalaya Early Childhood Development Program-ni bidingo talate on·na gita Budbar salo, dingtangmancha Community Sensitisation Program-ko Baghmara-ni Don Bosco Higher Secondary School-o ong·atangaha.
Ia program-ko ong·atanio Baghmara-ni BDO JN Sangma, jinmana rimchaksoani kattarangko aganangengon, Meghalaya Early Childhood Mission-ko a·bachengatani bidingo jinmana agan-talate on·angjolaha. Ia program-ni ning·o mongsongbate ma·giparang, me·chikrang, bi·sarang aro chadamberangna gisik on·e kamko ka·gen ineba Sangma aganaha.
Ia program-ko ong·atanio South Garo Hills DRDA-ni Project Director PR Marak-ba jinmana aganprakangengon, ia Early Childhood Program-ni gamchatgipa ong·ani bidingo janapangenba, je songrangko aro bi·sarangkon ICDS program-ni ning·o man·jaengachim, uandakgipa songrango aro bi·sarangna ia program-ni ning·o dakchakanirangko on·anggen aro ian a·dokna namgni ong·gen ine parakangaha. Ia program-ko a·bachengataniara bi·sarangnasan ong·aigija ma·a paarangnaba namgni ong·gen ineba Marak aganaha.
Ia ECD Mission-ko chu·sokgipa ong·atna gita Social Welfare, Community & Rural Development, Education, Health & Family Welfare aro dingtang dingtang department-rang nangrime kamko ka·gen ineba DRDA-ni Project Director aganaha.
Ia tom·anio dongpae bakko ra·anggipa gipin manderangara, Poshan Abhiyan-ni Social Welfare Consultant GM Nengmong, Poshan Abhiyan-ni District Coordinator B Ch Momin aro gipinrang ong·a.
