U·IATTIMGIPAONI
TURA: Selsella jolo donggipa Wakantagre aro Chibongagre LP skul nokrangko tarigija donchipahani a·sel da·o obostarang namjabatsrangaha ine A·chik Students Welfare Association (ASWA) parakatenba, ia jolo songdongenggipa manderangni aro mongsongbate ia skulrango poraienggipa bi·sarangni namgnina ta·raken ia skul nok damgniko taridape on·china ine a·dokni Education Minister Rakkam A Sangma-na sedoataha.
“Ia skul damgnion indita bilsirangna chingni bi·sarang a·gilsakni seng·aniko skie ra·bana man·aha indiba ia skul nokrangko taridapanirang dongjani a·selo da·alo ia skul nokrang obosta namsrangjaha. Ia skulni nokkingrang selpruan baksana, pakmarangba brettokaha aro rongtal an·talaniba dongjaha. Ian skulo poraienggipa bi·sarangnasan ong·aigija skie on·enggipa manderangnaba namen neng·nikaniko on·enga,” ine ASWA-ni general secretary Balkham M Sangma parakatenba, ia skul nokrangko ta·raken taridape on·china Education Minister-ko mol·molataha.
Ia skul nokrangko taridapaniara ia jolrango lekka porani gadangko namdapatasan ong·aigija ia jolrango pilakni gitan namroro silroroaniko ra·baani gita ong·gen ine janapatengon, ia skul nokrangko taridapanio maiba dakchakani ba bakrimaniko nanggenchimode sorkarina on·na kusi ong·aigen ine ASWA parakataha.
