U·IATTIMGIPAONI
TURA: Adita salrangna skang, All Garo Hills Anganwadi Workers & Helpers Association (AGHAWHA)-ni dilgiparang, Tura-ni MP Agatha K Sangma-ko grongenba, Anganwadi worker-rangni dingtang dingtang nanganirangko niatchina gita mol·molangaha.
AGHAWHA-ni general secretary MD Shira-ni u·iatani gitade, Anganwadi worker-rang dingtang dingtang kamrangko ka·na nangengoba da·o dipet ma·mong sorkarini on·enggipa gong 4500/- aro a·dok sorkarini on·enggipa gong 3000/-ko man·gope gimik gong 7500/-kosan man·paengani a·sel neng·nikanirangko chagrongna nangtokengani gimin Anganwadi worker-rangni man·gniko komibeoba japrako gong 20,000/-ona bariatchina gita Tura-ni MP-ko mol·molangaha.
Anganwadi worker-rangni kamna sorkarini on·gipa smartphone, ramram phone-san ong·e dingtang dingtang kamrangko ka·anio neng·nikanirangko man·na nangengani gimin Anganwadi worker-rangna nambata smartphone-rangko on·china gitaba AGHAWHA, Tura-ni MP-ko didiangaha.
Senior ong·batgipa aro kamni gimin u·ibatgipa Anganwadi worker-rangko Lady Supervisor-ni kamona ra·doatchina didiangengon, Lady Supervisor-ni 50 percent kamrangkode senior ong·batgipa Anganwadi worker-rangna kange donchina gita AGHAWHA mol·molangaha.
Anganwadi worker-rangna Polio immunization, TB suvey ka·ani aro uandakgipa kamrangko on·dapengani a·sel Anganwadi worker-rang neng·nikanirangko chagrongna nangtokenga ine janapatskaengon, Anganwadi worker-rangna kamni gri dormaharangkoba on·skachina gita AGHAWHA, Tura-ni MP-ko mol·molangaha.
Indake ong·engon, Anganwadi worker-rangni neng·nikani aro nangnikanirangko niatna gita Tura-ni MP ku·rachakaniko on·ataha ineba AGHAWHA-ni general secretary parakataha.