U·IATTIMGIPAONI
TURA: Garo Students Union (GSU) central executive committee (CEC)-ni president Tengsak G Momin-ko GSU eastern zone-ni ning·o donggipa dingtang dingtang regional unit-rang, kamtangko wate on·enba, CEC-ni gital president aro gipin dilgiparangko seokna election-ko ong·atchina dabitokani ja·man da·o GSU western zone north (Dadenggre)-ni dilgiparangba GSU-CEC-ni gital president-ko seokchina dabiangtokaha.
GSU-WZ (North) Dadenggre-ni president Tengsan M Marak-ni parakatani gitade, adita salrangna skang, GSU WZN Dadenggre-ni ning·o donggipa dingtang dingtang regional unit-rang baksa iani bidingo tom·e chanchirimangon, pilakan GSU-CEC-ni gital dake election ong·attaianiko nangnikahani gimin uamang CEC-ni election-ko ong·atchina dabina tik ka·e donangtokaha.
“Uni gimin ian CEC-ni gitcham dilgiparangna an·tangtangni kamko wate gital election-ko ong·atna namgipa somoi ong·enga maina da·o dipet CEC-ni dilgiparang dongjae, zonal aro regional unit-rangba neng·nikanirangko chagrongna nangenga. CEC-ni gadango dilgiparang dongjaniara nokdango ma·a paa gri chalaiani gita ong·enga. Uni gimin gitcham dilgiparang, kamko jako ra·e dongchipaigija, kamtangtangko wate gital election-ko ong·atna nangengaha,” ine Marak parakataha.
