U·IATTIMGIPAONI
TURA: North Eastern Hill University (NEHU) Tura Campus-o salgittamna ong·atenggipa Megha Start-Up Expo-ko Mongolbar salo, a·dokni Education Minister Rakkam A Sangma a·bachengate on·angaha aro ia Expo-ko a·bachengatanio, bading chiwalgiparang aro NEHU-ni dingtang dingtang department-rangba bakko ra·angaha.
Ia Megha Start-Up Expo-ko NEHU-ni BIRAC’S BioNEST Bioincubator (B3I) Facility, Prime Start Up Hub Meghalaya aro Odisha-oni BRTC KIIT-TBI nangrime ong·atenga aro ia Expo-ko a·bachengate on·angani somoio NEHU-ni Vice Chancellor Professor P S Shukla, RDAP-ni Head aro Associate Professor Dr BK Mishra, NEHU Tura Campus-ni Director Prof Sujata Gurudev, New Delhi-o donggipa BIRAC Technical Department-ni GM & Head Dr PKS Sarma aro gipinrangba dongpae bak ra·angaha.
Bading chiwalani kamrangko a·bachengatenggipa manderang, game ge·e cha·enggiparang, songo noko bading chiwale cha·enggiparang aro dingtang dingtang industry-rang, an·tangtangni man·enggipa bosturangko aro kamrangko mesokna man·na gita ia Megha Start-Up Expo-ko ong·atenga aro ian jolo bading chiwalgiparangna aro game ge·e cha·giparangna, dal·bata gadango bading chiwalani cholrangko ra·na namgipa chol ong·enga.
Ia Expo-ko a·bachengate on·angani somoio a·dokni Education Minister, jinmana aganprakangengon, ia program-o dongpae bakko ra·na man·ahani gimin an·tangni kusi ong·aniko parakangenba, ian bading chiwalgiparangna dingtangmanchagipa expo ba mesokani program ong·enga ine parakataha.
Jolo bading chiwale cha·enggipa manderangna iandakgipa cholrangko on·engani gimin ua dingtangmancha NEHU-koba mittelpilangaha.
Bading chiwalani kamrangko a·bachengate mikkangchi bading chiwalanio chu·sokgiparang ong·angchina gitaba Sangma, ia program-o bak ra·enggipa chadamberangko didiangaha.
