U·IATTIMGIPAONI
SHILLONG: Shillong songjinmani dam 44 gittimrango songdongenggipa manderangni ringna jakkalenggipa chirang ringna gita namja ine Commissionerate of Food Safety-ni ning·o donggipa State Food Testing Laboratory-ni porikka ra·e nianio ma·sina man·aha.
Shillong songjinmao ringani chini gimin manderangni badi ka·anirangko man·e, re·anggipa August jani 22 tariko, Federation of Khasi Jaintia & Garo People (FKJGP) dol, Shillong songjinmani dam 46 gittimrango ringna jakkalenggipa chiko porikka ra·e gita Commissionerate of Food Safety-ni State Food Testing Laboratory-ona watatahachim.
Ia porikka ra·e niani report-ko parakatahaon, dam 46 gittimrangoni damgni, chong·motan Demthring aro Mawblei gittimrango ringna jakkalenggipa chirangsan ringna gita namaia indiba gipin dam 44 gittimrango ringna jakkalenggipa chirangna ringna gita namja ine ma·sina man·aha.
Report-o parakani gitade, ia dam 44 gittimrango ringna jakkalenggipa chio Coliform aro E. coli organism-rang baksana nangana bate iron aro gipin samrang dongani gimin Food Safety & Standards Authority of India (FSSAI)-ni dongimin niamo pangchake ringna namgipa ong·jachim.
FSSAI-ni dongimin niamo pangchake ringna namgipa chio 6.5-oni 8.5-ona pH value dongna gita nangachim aro 6.5-na komiahaode ua chiara acid donggipasa ong·aha ine FKJGP-ni dilgiparang parakataha.
Iron-naba mandeni be·enna namgipa ong·genchimoba ringani chio iron bang·dugagenchimode uan be·en bimangna namgijaniko, jekai diabetes, ok saani, ka·rekanirangko ong·ate an·gilni cell-rangko nosto ka·na man·a ineba FKJGP-ni dilgiparang parakataha.
Iron bang·dugagipa chiko ringgenchimode mandeni bika, ka·tong aro uandakgipa bosturangkoba nosto ong·atna man·a ineba FKJGP talataniko on·angaha.
Indake ong·engon, FKJGP-ni man·gipa test report-rangko Mongolbar salon a·dok sorkarina on·ataha aro ia songjinmao on·enggipa ringani chirangko nambate nirokchina gita FKJGP, a·dok sorkariko didiataha.
