U·IATTIMGIPAONI
TURA: Assam aro Meghalaya a·dokni gisepo mongsongbatgipa ramarangoni dilsa, chong·motan Agia-Medhipara-Phulbari-Tura (AMPT) ramani obostarang da·o namjabatengahani a·sel, ramako re·ruraenggipa manderang aro jolo songdongenggipa manderang neng·nikanirangko chagrongna nangtokengaha.
Ia ramani bang·bata bakrangan da·o namkalahaoba Rajabala-oni a·bachenge, Hallidayganj, Pipulbari aro Gongglanggre-ona kingkingan chiklokrara dake re·ruraenggipa manderangna neng·nikanirangko on·enga.
Kosako janapgimin gita Rajabala jolrangonin ia ramao a·kolrara dake da·o mikkarang waani somoirangode rama jol gimikan chi pokkri dakararakosa nikna man·engaha aro bilsi bongamangna skang black topping on·gipani chinkoba ia ramani bakrango da·o nikna gita man·srangjaha.
Ia jolrango ramarangko giseprangosan tarirongaia aro je rama taribaaba kamrang namen ka·sinronga ine jolo songdongenggipa manderang matnangataha.
Ia rama re·ruraanio neng·nikanirangko chagrongna nangtokengoba, Assam-oni West Garo Hills-ni a·kawe jolrangona ia ramaan bakkandikbatgipa ong·ani gimin salantian hajalni hajal gari gorarang, ia ramakon re·ruratokskaenga.
Adita salrangna skang, ia ramani bidingo Phulbari-ni MLA aro a·dokni Power Minister Abu Taher Mondal, sorkarina u·iatenba, ia jolrango songdongenggipa manderangni namgnina ia ramako National Highway dake tarichina didiangahachim ine nikna man·a.
Iani bidingo ua a·dokni Deputy Chief Minister aro PWD (Roads) Minister Prestone Tynsong baksaba agangrikmanaha aro PWD Minister iani bidingo chanchina gita ra·angaha ineba Mondal parakataha.
Adita salrangna skang ong·atanggipa Assembly-ni Autumn Session-oba ia ramani bidingo Rajabala-ni MLA Dr Mizanur Kazi-ba sorkariko sing·doangenba, ia ramako tariningjaengani gimin an·tangni suk ong·gijaniko parakatahachim.
Jolo songdongenggipa manderangni parakatani gitade, ia ramani obosta namsrangjaengahani a·selan da·o gita wachini somoiode chibolrara dake aro a·ran karini somoiode a·dimurara dake ia ramako re·ruraenggipa manderangsan ong·aigija rama sambarango songdong a·chaenggipa manderangba neng·nikanirangko chagrongna nangtokenga.
Indake ong·engon, ia ramako tarin agita sorkari, tangka paisarangkode chamatmanahachim indiba ramako taridapna kamko man·gipa contractor, da·onan kamrangko a·bachengkujaenga ineba jolo songdongenggipa manderang matnangataha.
