U·IATTIMGIPAONI
SHILLONG: Meghalaya Grassroots Music Project-ko gnigipa changna Budbar salo, a·dokni Chief Minister Conrad K Sangma, Police Bazar-o a·bachengate on·angaha aro ia project-ko a·bachengatanio a·dokni Tourism Minister Paul Lyngdoh, Health Minister Ampareen Lyngdoh aro dingtang dingtang official-rangba dongpae bak ra·angaha.
Ia project-ko a·bachengatanio Sur Na Nongkyndong, Na U Bnai, Colours aro uandakgipa dolrang, gitrangko ring·e manderangko an·saoatangaha.
Ia project-ko a·bachengate on·angani somoio a·dokni Chief Minister, jinmana aganprakangengon, iandakgipa project-ko a·bachengatani India a·song gimiko Meghalaya a·dokan skanggipa ong·enga aro ian Meghalaya a·dokko India a·songo Music Capital gita mesokgen ine parakataha.
Chief Minister-ni parakatani gitade, ia project-ko skanggipa bilsio a·bachengatanio Meghalaya a·dok gimikoni sak 1600-na baten git ring·na aro dokna dam·na changgipa chadamberangko chubata gadangona ra·dona man·aha.