Shillong-o DC aro SDO-rangni tom·bimonganiko ong·ata
U·IATTIMGIPAONI
SHILLONG: Bristibar salo, Deputy Commissioner (DC) aro Civil Sub-Divisional Officer (SDO)-rangni tom·bimonganiko Shillong songjinmani Pinewood Hotel-o ong·atangaha aro ia tom·bimonganio a·dokni Chief Minister Conrad K Sangma, mongsonggipa sokgipa ong·e bakko ra·angaha.
Ia tom·bimonganio a·dokni Chief Minister, jinmana aganprakangengon, Meghalaya a·dokko ‘Meghalaya Next’-ni ning·o namgipa ong·aoni nambatsranggipa ong·atna niksamsoe kam ka·enggipani bidingo aganangaha.
“An·ching ku·cholsan ong·e kamrangko ka·angna gita nangenga aro mongsongbatede, songadam nokadamrango kamrangko nambate nirokna nangenga. An·chingni kamrango Technology-an mongsonggipa ong·e kamko ka·enga aro CM Connect, Village Data volunteers, DC Connect aro Family ID program-rangna an·chingni dongimin nisanrang bakan bite nanggipa ong·gen ine anga ka·dongenga. An·ching kamrangko ka·e re·mikkangengon, maiba neng·nikanirangko chagrongna nanganirangona an·tangtangko tarisamsona gita na·simangni gamchatbegipa ku·pattianirangkoba nanga. Meghalaya a·dokko Dollar Billion 10 Economy ong·atna gita an·chingni kamrangko an·ching dontongjana,” ine Chief Minister, dingtang dingtang a·jani deputy commissioner aro SDO-rangko ku·mongangaha.
Sorkarini dingtang dingtang scheme-rang, jekai Jal Jeevan Mission, PMAY, CM Solar Mission aro uandakgipa scheme-rangko chu·sokatna gita nambate kamrangko ka·chinaba ua, DC aro SDO-rangko didiangaha.
Ia tom·anio DC aro SDO-rangna agan-ku·pattie on·anggipa gipin manderangara, Planning Department-ni Commissioner & Secretary Dr Vijay Kumar, Meghalaya State Public Service Delivery Commission-ni Chief Commissioner MS Rao aro gipinrang ong·a.