U·IATTIMGIPAONI
SHILLONG: Re·baenggipa 2024 bilsini Lok Sabha election-o National People’s Party (NPP) baksa susana gita Congress dolni bakrimna okamaniko dingtang dingtang Opposition dolrang jegalattokskaaha.
Meghalaya a·doko aro mongsongbate Tura Lok Sabha constituency-o NPP-ni candidate baksa susana dingtang dingtang opposition dolrangko apsan bakrimna gita adita salrangna skangsan Congress dolni dilgipa saksa, ku·monganiko on·atahachim ine nikna man·a.
Indake ong·engon, Lok Sabha election-o opposition dolni gisepo bakrime susaaniko Trinamool Congress aro Voice of the People’s Party (VPP) dolgnian ‘ong·na amgijani’ ine janapatskaaha.
“Opposition dolrangko bakrimchina Congress aganenga, uni gimin political dolrang pilakan an·tangtangni nangnikani gita dakchina. Ian ong·na amgen ba amjagen inede anga aganjaenga indiba iandake ku·monganiko chinga maina ra·chakgen? Na·simang ku·pattina ba ku·mongnade man·aia indiba na·simangni nangnikani gita pilakan dakgen, ia katta ong·ja,” ine TMC-ni state president Charles Pyngrope aganaha.
Indake ong·engon, Opposition dolrangko bakrimna okamaniara Garo Hills-osa chu·soknaba gnang indiba Khasi-Jaintia Hills-ode ian ong·na amjawa ine VPP-ba parakataha.
“Chingni dolde darang party-rang baksaba bakrimani dongjawa ine chinga talen aganmanahani gimin Khasi-Jaintia Hills jolrangode ian chu·sokgipa ong·na man·jawa. Chingade doltangarisa susaaigen aro chinga bebera·a chingni bimchipe kam ka·anichi aro manderangni chingni ka·donganichi chinga election-o chu·sokgipa ong·telgen,” ine VPP-ni ku·wattimgipa Batshkem Myrboh aganaha.
Meghalaya a·dokko Congress dolan dilsretaha aro Congress dolara toromigiparangni dol ong·ja ine uamang maming saloba gualjawa ineba Myrboh aganaha.
“Ia political dolrangni mingsa bewalara uamang rongtalgipa politics-o bebera·giparang ong·ja. Uni gimin Congress dol, gipin political dolrang baksa bakrimaichina indiba chingade bakrimjawa,” ine VPP-ni dilgipa parakataha.
Re·baenggipa 2024 bilsini Lok Sabha election-o Tura parliamentary constituency-oni National People’s Party (NPP)-ni candidate Agatha K Sangma baksa susana pilak opposition dolrangan bakrimna nangenga ine Budbar salo, Congress dolni working president aro a·dokni gitcham cabinet minister Deborah C Marak aganahachim.