U·IATTIMGIPAONI
TURA: Adita salrangna skang, West Garo Hills a·jani Selsella jolo dosgri mande saksako police constable saksa kragija dokaha aro iani bidingo FIR ka·on FIR-ko segatna gitaba jechakaha ine matnangenba, West Garo Hills a·jani Superintendent of Police (SP)-na badi ka·doataha.
SP-na badi ka·doanggipa chittio parakatani gitade, re·anggipa September 30 tarik attamni 8:30 bajimango dokako man·gipa Notjeng R Marak, an·tangni ripeng saksa baksa motorcycle-o Selsella-oni noktangona re·angpilengmiting somoio Apalgre dolongo dikdiksa neng·takengachim. Uandakmiting somoio Bolero aro Gypsy gari bolgni re·bae, uamangni sepango neng·takeaha aro garioni me·chik saksa indita walni somoio uamang mai dakenga ine sing·ataha. Uni sing·anina uamang aganchakkujaengon, gypsy garioni constable saksa re·bae, Notjeng Marak-ko uni ja·arango skatang dokeaha. Dokako man·e, uni ja·arango bilongbee saknaanirangko man·ahani gimin ja·mano uni ripeng uko sanna gita Selsella CHC-ona rimangaha. CHC-o sanna bananiko ra·ani ja·man uamang, Selsella police outpost-ona re·ange, uko dokgipa constable-ni kosako FIR ka·eahachim indiba uamangni FIR ka·ako police officer, register ka·na jechakaha.
Indake ong·engon, ia a·selni bidingo sandirokatenba, kosako janapgipa constable aro police officer-ni kosako rakgipa ja·kurangko de·china ia manderang, West Garo Hills a·jani SP-ko didiataha.
