U·IATTIMGIPAONI TURA: Meghalaya Board of School Education (MBOSE)-ni Golden Jubilee ba bilsi 50 gapaniko re·baenggipa October-ni 17, 18 aro 19 tarikrango salgittamna Tura-o manianggen ine MBOSE-ni Director (Administration) u·iataha. MBOSE-ni Golden Jubilee-ko salgittamna manianio ‘Milestones of MBOSE’-ni bidingo PPT presentation baksana Souvenir oprakani aro dingtang dingtang skulrangna quiz aro cultural program-rangkoba ong·atanggen. Ia manianiko a·bachengatani bak gita October-ni 17 tariko dingtangmancha NH-51, MBOSE staff aro dingtang dingtang skulrang, MBOSE campus-oni pring 9:15 baji dipet New Tura-o donggipa Green Haven-ona jinma re·jomaniko ong·atanggen. Gnigipa salo, chong·motan October-ni 18 tariko a·dokni Deputy Chief Minister Sniawbhalang Dhar, mongsonggipa sokgipa ong·e bakko ra·anggen aro unbaksana a·dokni Education Minister Rakkam A Sangma, Education department-ni Commissioner & Secretary Pravin Bakshi aro dingtang dingtang official-rangba dongpae ia manianio bakko ra·anggen. Gnigipa salni salpaksachibara dingtangmancha ‘The Spread of Education in Meghalaya’-ni bidingo Academic Discourse Session-ko ong·atanggen aro ia Session-o dingtang dingtang manderang, on·gimin katta bichong pangchake jinmana aganprakanggen. Ia maniani gittamgipa sal, chong·motan October-ni 19 tariko, a·dokni Chief Minister Conrad K Sangma, mongsonggipa sokgipa ong·e bakko ra·angskagen aro unbaksana a·dokni Education Minister Rakkam A Sangma, Meghalaya sorkarini Chief Secretary DP Wahlang aro gipin official-rangba dongpae bak ra·anggen. Ia apsan salni pringo dingtangmancha ‘Road Map of State Education Board under NEP 2020’-ni bidingo Academic Discourse Session-ko ong·atanggen aro iano salgro salaram jolo donggipa dingtang dingtang board-ni official-rang bakko ra·anggen. Gnigipa aro gittamgipa salrangode program-ko pring 11:00 baji dipet a·bachenggen ineba MBOSE-ni Director u·iataha.
