U·IATTIMGIPAONI
SHILLONG: Shillong-Dawki road project-ni kamrang bilsigni batpile bon·chipani ja·man da·o ia project-ni Shillong-Upper Shillong (Package 1) ramako ia jaoni tarina a·bachenggnok.
Mongolbar salo NHIDCL-oni u·iatani gitade, ramako tarina ia jaoni a·bachengatgnok aro ia kamna NHIDCL, kamko jako ra·e ka·enggipa agency baksaba songgigrikanio soi ka·manaha.
Ia kilometer 11.60 ong·gipa ramako gong kror 351 korosna New India Contractors-BCC (JV) jako ra·e tarina sienga.
Ia ramako tarina gita a·arangko pakwatmanahama ine sing·anina aganchakaniko on·angengon, uamang ramani bang·bata baknan a·arangko man·aha aro metre 170-mangni gita biaprangsan dongaiaha ine NHIDCL-ni official parakataha.
Ia four-lane ramako matchotna gita kam ka·enggipa company, bilsignimang somoiko nanggen ineba official parakataha.
Ia project-ni package 1-ni kamrangko COVID sajinmani somoion a·bachengahachim indiba ia kamko jako ra·e ka·enggipa gitcham contractor, adita somoirangna kamko ka·ani ja·man kamko watgalaiahachim.
Ia project-ara JICA-ni gita tangka paisarangchi dakchake on·enggipa project-an ong·achim aro Shillong-oni Upper Shillong-ona dakanggipa ramao pangnan garirang apchangket ong·rongani gimin ia ramako ta·raken matchotna nangengachim.
Ia km 90 ong·gipa project-ko package ge·bonga dake bak ka·aha aro ianoni package ge·gittamkode gitcham contractor-rang watgalani ja·man gital contractor-rangna on·taikujachim.
Batanggimin somoirangode ia project-na Indian Institute of Geomagnetism-ba a·arangko wate on·na jechakengachim.
Ia project-ko Meghalaya High Court-ni gitaba nirokenga aro ia ramako tarianio Shillong songjinmao donggipa bolrangko den·jachina ge·etaniko on·manahachim.