U·IATTIMGIPAONI
SHILLONG: Opposition Congress, a·dok sorkariko education-ko namdapatchina aganaha. A·dok sorkarini data-o chonchongipa nangchongmotgiparang jekai bijoli, library aro paikana nokrangan Meghalaya-ni bang·a school-rango donggijako mesokaha.
“Ian gital katta ong·ja, education-na chamgipa budget namen komia. School-rangko kuliaon population mapping ba mande jelaniko nirongja. MLA-rang vote-ko man·amangmang kam ka·a. Indake da·ode 8k baten school-rang dongjok,” ine Meghalaya Pradesh Congress Committee-ni general secretary Manuel Badwar aganaha.
A·dokni education-ko namdapatna sorkari kam ka·na nangenga, education system-ko namdapatna political-ni gitaba sikani dongna nanggen, technology-ko rikani palo ramram nangchongmotgipa nangnikarangko donchengna jotton ka·na nanga.
Sorkarini dasboard-o mesokani gita, ge 2,658 school-rango (18 Percent) me·chik bi·sarangna toilet ba paikana nok dongja, iako FY 2021-22-ni data-o mesokaha. Jekon Department of School Education and Literacy parakaha.
Me·chik bi·sarangni toilet-ni gimin janapgenchimode, sorkari school-rango me·chikrangna rikgipa paikana 26% baridapaha.
Iarangni gisepon ge 11,000 (76 percent) school-rango library-an dongja, private school-rangoni 80 percent private school-rang, library dongako nangniktoka.
Ge 11,000 school-rango (75 percent) power connection ba bijoli dongja ine Dash board-o mesokaha.
Rongtalgipa ringani chini gimin niatgenchimode, a·dokni bang·a 53 percent school-rangon namgipa rongtalgipa chi ringaniko man·a. Chini bidingode percentage namkuenga.
Indiba hand washing ba jakko jaksuani cholrang a·dokni 62 percent school-rango dongja. 71 percent school-rango maming medical facility dongja.
Dashboard-ni gita, a·doko ge 14,600 school-rangoni ge 7,783 sorkari school ong·a, ge 4,172 aided school ong·a aro ge 2,120 private school ong·skaa.
A·doko sak 55,160 skigiparang donga, jeoni sak 22,901 sorkari schoolni skigiparang, sak 17,658 aided school teacher-rang aro sak 12,209 private school-ni teacher ba skigiparang ong·a.
