U·IATTIMGIPAONI
TURA: Ma·mong sorkarini ra·gate on·gipa dingtang dingtang scheme aro program-rangni chu·sokanirangko nipilan baksana kam ka·ani bewalrangko nipilna gita ia antio, Tura-ni MDC Bernard N Marak, South West Garo Hills aro South Garo Hills a·jani dingtang dingtang block-rangona re·angskagen ine u·iataha.
Koborko on·ani gitade, October-ni 17 tarik attamni 2:30 bajimango ua, South West Garo Hills a·jani Rerapara Block-ona re·anggen aro October-ni 18 tarik pring 10:30 bajimango ua Zikzak Block-ona re·angenba, apsan salni attam 2:30 bajimango Betasing block-ona re·angskagen.
October-ni 19 tarik pring 10:30 bajimango Tura-ni MDC, South Garo Hills a·jani Chokpot block-ona re·angenba, apsan salon attamni 2:30 bajimango Gasuapara block-ona re·angskagen aro October-ni 20 tarik pring 10:30 bajimango Marak, Rongara block-ona re·ange, apsan salni attam 2:30 bajimango Baghmara block-ona re·angskagen ine u·iataha.
Iani bidingo u·iataniko on·atengon, je manderangan, MGNREGA, PMAY, JJM, Old Age Pension, Widow Pension, Specially Abled Pension, Scholarship aro uandakgipa man·gnirangko ra·anio neng·nikanirangko chagrongna nangengachim, an·tangtangni block office-rango dongsoenba, talataniko on·china Tura MDC didiataha.
“Ma·mong sorkarini kangal cholgrirangna ra·gate on·gipa scheme-rangni bidingo ma·sitokkujani a·sel block-rango ma·sisretgrikanirang dongengani gimin iandakgipa ma·sisretani aro kamo olgrokanirangko namatna gitasa anga dingtangmancha block-rangona re·roroe kamrangko nienga. Ia scheme aro program-rangko an·chingni Prime Minister Narendra Modi, dingtangmancha kangal cholgrirangna cholrangko on·na gitasa ra·gate on·aha indiba mitam manderang, ia scheme-rangko on·anio kangal cholgrirangonikon tangka paisarangko dabie ra·pilengani gimin iandakgipa niam gri dakanirangko bon·atna ian angni ja·ku de·ani ong·enga,” ine Marak parakataha.
