U·IATTIMGIPAONI
SHILLONG: Re·baenggipa 2024 bilsini Lok Sabha election-o Bharatiya Janata Party (BJP)-ni dilgiparang uko Shillong Parliamentary seat-oni susachina nangnikode ua susana kusi ong·aigen ine Sombar salo, a·dokni Cabinet Minister aro BJP-ni dilgipa AL Hek parakataha.
Lok Sabha election-o uko BJP-ni dilgiparang susachina draenga ine kobor on·gipani bidingo sing·on, ua an·tangde iani bidingo kobor man·soa dongkuja indiba election-o uko susachina gita BJP-ni dilgiparang nangnikenga ong·ode ua jechakajawa ine Hek parakataha.
“Ia pilakan ma·mongo BJP-ko dilgiparangni nangnikani gitasa ong·aigen maina uamangan candidate-rangko baseenba nambatakosa seokgen,” ine Hek aganenba, election-o BJP susaenga ong·ode susamangmangaigija chena gitasa susana nanga ine parakataha.
Batanggimin chang election-rango BJP name dakna man·jaha ine ku·rachakangengon, Meghalaya a·dokni manderangde badiaba party-rangko seokgipa ong·ja aro batanggimin chang Assembly election-oba BJP, badiaba badiaba seat-rangode name dakna man·aha indiba mitam constituency-rangode name dakna man·jaha ine Hek parakataha.
Hek-ni parakatani gitade, BJP dolara election-mangmangosan kamrangko ka·aigipa ong·ja indiba pangnan kamrangko ka·gipa dol ong·a.
2014 bilsi dipetan ma·mongo BJP, sorkariko chalaina man·engahaoba Meghalaya a·dokode chu·sokna gita man·kujaengachim aro ia chang Lok Sabha election-oba BJP, Shillong aro Tura Parliamentary constituency damgnion susataina nangnikengachim.