MBOSE-ba a·songo nambatsranggipa board-rangoni damsa: Dhar
U·IATTIMGIPAONI
TURA: Budbar salo, Meghalaya Board of School Education (MBOSE)-ni Golden Jubilee ba bilsi 50 gapaniko Tura Walbakgre-o donggipa Green Haven-o manianio, a·dokni Deputy Chief Minister Sniawbhalang Dhar, mongsonggipa sokgipa ong·e bakko ra·angaha aro unbaksana a·dokni Education Minister Rakkam A Sangma aro dingtang dingtang official-rangba dongpae bak ra·angtokaha.
Ia tom·anio a·dokni Deputy Chief Minister, jinmana aganprakangengon, MBOSE-ni bilsi 50-na re·mikkangbaanio chu·sokatna man·gipa dingtang dingtang kamrangna mittelpilangenba, ian a·songo nambatsranggipa board-rangoni damsa ong·enga ine parakataha.
A·doko lekka porako on·anio dingtang dingtang neng·nikanirangko chagrongna nangengoba namroro silroroaniko nikna man·engaha ine janapatengon, ia pilakan MBOSE-ni rakbee kamrangko ka·anichisa ong·enga aro mikkangchiba apsan daken kamrangko ka·angkugen ine Dhar, an·tangni ka·dongchakenganiko parakataha.
Dingtang dingtang porikkarango chu·sokgipa chatro chatrirangnaba ia salo ua an·tangni namgipa skaniko parakataha aro jolo songdongenggipa manderangni namgnina an·tangtangko on·kange kamko ka·engani gimin MBOSE-ni pilak officer-rangko aro gipin kam ka·giparangkoba mittelpilangaha.
Ia tom·anio a·dokni Education Minister Rakkam A Sangma-ba jinmana aganprakangengon, bilsi 50 gapahani gimin MBOSE-ni pilak nokdangrangnan an·tangni namgipa skaniko on·angaha.
Batanggimin bilsi 50-ni gisepo an·tangtangko on·kange kam ka·anggipa MBOSE-ni official-rangko mittelpilangengon, Meghalaya a·dokko man·ani ja·man MBOSE-ko Tura-o kulianiara Garo Hills-ni manderangnasan ong·aigija a·dok gimikni manderangnan pattiani gita ong·aha ine Sangma parakataha.
Ia tom·anio MBOSE-ni Controller of Examinations TR Laloo, MBOSE-ni bidingo kan·dike janapangengon, Meghalaya Board of School Education Act-ko 1973 bilsio a·bachengataniara Meghalaya a·doko lekka porako on·anio pangchakani gita ong·aha ine parakataha.
Laloo-ni parakatani gitade, MBOSE-ni skanggipa High School Leaving Certificate (HSLC) porikkako 1973 bilsio ong·atchengaha aro ia porikkako gimik sak 3797 candidate-rang seenba 38.3 percent-ni gita pass ka·ahachim. Ua somoioni da·o 2023 bilsio SSLC porikkao pass ka·ani 78 percent-ona tang·doangaha ineba Laloo parakataha.
Ia manianio dongpae bakko ra·anggipa gipin manderangara, MBOSE-ni Executive Chairman CP Marak, Education department-ni Secretary Ambrose Ch Marak, MBOSE Shillong Regional Office-ni Joint Director (Administration) Macdonald Marbaniang aro gipinrang ong·a.
Ia maniani bon·kamgipa sal, chong·motan da·al Bristibar salo, a·dokni Chief Minister Conrad K Sangma, mongsonggipa sokgipa ong·e bakko ra·angskagen aro unbaksana a·dokni Education Minister Rakkam A Sangma, Meghalaya sorkarini Chief Secretary DP Wahlang aro gipin official-rangba dongpae bak ra·anggen. Ia apsan salni pringo dingtangmancha ‘Road Map of State Education Board under NEP 2020’-ni bidingo Academic Discourse Session-ko ong·atanggen aro iano salgro salaram jolo donggipa dingtang dingtang board-ni official-rang bakko ra·anggen.