U·IATTIMGIPAONI
TURA: Adita salrangna skang, bilsi 12 ong·gipa me·chik bi·sako til·ekdraenba so·ote galani gimin Selsella jolo donggipa dingtang dingtang NGO-rang raken jegalatenba, dos dakgipa mandena rakbatsranggipa sastiko on·china dabiangtokaha.
Koborko on·ani gitade, ia me·chik bi·sa, October 8 tarikonin nokoni gimaahachim aro uni manggisiko salgni ja·mansa man·ahachim.
Ia me·chik bi·sara, Class 4-o poraienggipa bi·sasa ong·achim ineba kobor on·aha.
Ia a·sel ong·ani ja·man police-rang, me·chik bi·sako so·otanio jak donga ine chanchichipgipa mandeko rim·ahachim aro da·o Selsella jolo donggipa dingtang dingtang dolrang, dos dakgipa mandena rakbatsranggipa sastiko on·china dabitokaha.
Dos dakgipa mandeko ta·raken rim·ahani gimin Selsella-ni police-rangko mittelpilangengon, ia me·chik bi·sani nokdangna kakket bichalko on·china gita NGO-rang, sorkario dabiangskaaha.
So·ota man·gipa me·chik bi·sana aro uni nokdangna kalimpaaniko mesokna gita re·anggipa October-ni 12 tarikoba NGO-rang, dingtangmancha jinma mombatirangko so·e tom·anikoba ong·atangaha.
