U·IATTIMGIPAONI
TURA: South Garo Hills a·jani Jatrakona-o gital rikenggipa health sub-centre-ko name rikja ine Association for Democracy & Empowerment (ADE) Gasuapara regional unit matnangataha.
ADE Gasuapara unit-ni parakatani gitade, Jatrakona sub-centre-ko rikanio cement aro chips-na bate an·chengkosa bang·bate jakkalaha aro ian bang·e ru·ute bainagipa nok ong·jaengachim.
“Jatrakona songo gital rikgipa health sub-centre-ko chinga nina re·angon, ia gital nokko rikanio cement aro rong·srekrangna bate an·chengkosa bang·bate jakkalaha ine chinga nikna man·aha. Ian mikkangchi sanna bananirangko ra·enggipa manderangna aro sub-centre-o kam ka·enggipa manderangnaba kenchakna nangani ong·gen. Uni gimin chinga Medical department-ni official-rangko, mongsongbate District Medical & Health Officer-ko engineer-rang baksa ta·raken ia nokko niechina didiatenga,” ine ADE Gasuapara regional unit-ni dilgiparang parakataha.
Ia gital health sub-centre-ko ia 2023 bilsini gisepon matchotna nangahachim ine janapatengon, iani bidingo sandirokanirangko dakenba, ia sub-centre-ko nikenggipa contractor-ni kosako rakgipa ja·kurangko de·china gitaba ADE Gasuapara unit-ni dilgiparang, a·dokni Health Minister-koba didiataha.