U·IATTIMGIPAONI
SHILLONG: Meghalaya a·dokni Final Electoral Roll-ko re·baenggipa 2024 bilsini June 1 tariko chapa ka·gen ine Bristibar salo, a·dokni Chief Electoral Officer (CEO) BDR Tiwari parakataha.
Iani bidingo kobor ra·timgiparangna talataniko on·angengon, ia bilsini October jaona kingking Meghalaya a·dok gimiko sak 21,86,151 voter-rang donga ine Tiwari parakataha.
“Ia sak 21,86,151 voter-rangoni sak 10,81,006-de me·asarang, sak 11,05,142-de me·chikrang aro sak 3-de third gender voter-rang ong·a,” ine ua aganaha.
Da·alona kingking EPIC-rangko 100 percent sualmanaha ine janapatengon, 2023 bilsini January 5 tarikona kingking EP ratio-ara 645 aro gender ratio-ara 1022 ong·a ine CEO parakataha.
“A·doko gimik dam 3,482 polling station-rang donga aro pre revision-ni kamrangko ka·ani ja·man dam 32 gital polling station-rangko kulina tik ka·enba polling station damgnikode apsan ong·ataha. October 27 tarikona kingking chu·gimik polling station-rang dam 3,512 ong·gnok,” ine ua aganaha.
Tiwari-ni parakatani gitade, uamang dingtang dingtang political dolrang baksa tom·e agan-talatanirangko on·manaha aro political dolrangni gitaba an·tangtangni Booth level agent-rangko songaha.
October 27 tarikoni December 9 tarikona jegalna nanganirangko ra·chakanggen aro November-ni 11 aro 18 tarikrango special campaign-ko ka·anggen ine janapatengon, ia salrangni gisepo BLO-rang, polling station-rango special campaign-ko dakanggen ine CEO parakataha.
Meghalaya a·dok gimiko sak 3,512 booth level officer-rang donga ineba Tiwari parakataha.
