U·IATTIMGIPAONI
AMPATI: Sukrobar salo, South West Garo Hills a·jani Rerapara C&RD Block-ni ning·o donggipa Dorambok songo Urban Health & Wellness Centre-ko Rangsakona-ni MLA Subir M Marak, nokdonggae on·angaha.
15th Finance Commission-ni ning·o South West Garo Hills a·jana dambonga Urban Health & Wellness Centre-rangko on·aha aro ia dambonga centre-rangoni Dorambok Urban Health & Wellness Centre-an bon·kame nokdonggagipa ong·aha.
Ia Urban Health & Wellness Centre-ko nokdonggae on·anganio SWGH a·jani ADC YW Momin, Rerapara Block-ni BDO A Ch Momin, SWGH a·jani DM&HO H Barman aro gipin official-rangba dongpae bak ra·angaha.
Dorambok songni Urban Health & Wellness Centre-ko nokdonggae on·anganio Rangsakona-ni MLA, jinmana aganprakangengon, ia health centre-ko name jakkalchina aro songsalna jakkaltogipa bostu gita jakkalchina songni manderangko didiangaha.
Rongtal an·talaniko rakkichina gita songni manderangko didiangengon, district administration-ni dakchakanichi ia health centre-ko namdapatna gita Marak, ku·rachakaniko on·angaha.
Dorambok jolrango songdongenggipa manderangni ambulance gariko on·china mol·molengani gimin janapatengon, ua ia bilsini December jani gisepon ia songna ambulance-ko on·na gita ku·rachakanikoba on·angaha.
Garobadha-o health centre-rangko nangdapkuenga ine janapatengon, Garobadha PHC-ko Community Health Centre (CHC)-ona ra·doatna gita ia bilsini gisepon ua proposal-ko on·gen ine Rangsakona MLA ku·rachakaniko on·angaha.
Damalgre jolo songdongenggipa manderangna PHC-ko kulie on·na gita ua rake kamko ka·gen ineba Marak ku·rachakaniko on·angaha.
