U·IATTIMGIPAONI
TURA: Re·anggipa Sonibar salo, South Garo Hills a·jani District & Sessions Court Complex-ko Meghalaya High Court-ni Chief Justice Sanjib Banerjee, Baghmara-o nokdonggae on·angaha.
Ia District & Sessions Court Complex-ko nokdonggae on·anganio a·dokni Education Minister Rakkam A Sangma, Meghalaya High Court-ni Judge, Justice HS Thangkhiew, sakgipin Judge, Justice W Diengdoh, Additional Judge, Justice B Bhattacharjee, Baghmara-ni MLA Kartus R Marak, court official-rang, District administration-ni officer-rang, chatro chatrirang aro jolo songdongenggipa manderangba dongpae bak ra·angtokaha.
Ia gital court complex-ko nokdonggae on·angani somoio Meghalaya High Court-ni Chief Justice, tom·anio bak ra·giparangna aganprakangengon, ia gital court complex-ko nokdonggaanichi jolo songdongenggipa manderang bang·a namgnirangko man·gnok aro manderangna kakket bichalko on·anio kacharina bang·a dakchakani ong·gnok ine parakangaha.
Ia court complex-ko somoi gita matchotate on·ahani giminba ua kusi ong·aniko parakangaha.
Ia court complex-ko rikna gita pilak nanga dakchakanirangko on·ahani gimin sorkariko, district administration-ko aro court-ni official-rangko mittelpilangengon, ia gital court complex-ko rikanichi South Garo Hills a·janasan ong·aigija gipin a·jarangnaba namgni ong·gen ine Justice Banerjee, an·tangni ka·dongchakenganiko parakataha.
South Garo Hills a·jao donggipa sam bolrang aro do·o matrangni gimin aganangengon, namroro silroroaniko ra·baanio samtangtango ong·telaigiparangkode nisigalskana nangja ine Meghalaya High Court-ni Chief Justice didiangaha.
Ia District & Sessions Court Complex-ko nokdonggaani somoio a·dokni Education Minister Rakkam A Sangma-ba jinmana aganprakengon, ia court complex-ko rikna cholrangko on·ahani gimin sorkariko mittelpilangenba, ia court complex-ko rikanichi manderang kakket bichalko ra·anio bang·a dakchakanirangko man·gnok ine parakataha.
