U·IATTIMGIPAONI
SHILLONG: North Eastern Hill University (NEHU)-ni Vice Chancellor Prabha Shankar Shukla-ko jegalenba NEHUTA, NEHUSU aro NEHUNSU dolrangni nangrime bikotgipa Joint Action Committee (JAC), October-ni 31 tariko Academic Council-ni tom·aniko ong·atanio bak ra·gija jingjengataniko a·bachengatna tik ka·angaha.
‘Niam gri’ kamo rakkiako man·gipa contractual technical officer/senior consultant Rohit Prasad-ko October 26 tarik waljatchini gisepon kamoniko ra·galpilchina dabianiko chu·sokatjahani gimin VC-ni kosako jingjengatanirangko dakna JAC parakataha.
JAC-ni chairman Lakhon Kma-ni parakatani gitade, ‘niam gri’ kamo rakkiako man·gipa Rohit Prasad-ko kamoniko ra·galpilchina dabianiko aro ia dolgittamni dingtang dingtang dabianirangko NEHU-ni VC knachakna gita gisiko nangjahachim.
“Chingni dabianirangko VC knachakjahani gimin chinga Mongolbar salo ong·atenggipa Academic Council-ni chang 111-gipa tom·anio bak ra·gija jingjengatanirangko a·bachengatna tik ka·aha,” ine Kma aganaha.
‘Niam gri’ kamo rakkia man·gipa official-ko kamoniko ra·galpilan baksana statutory officer-rangko, university engineer-ko aro CDC-ni director-ko ta·raken songchina gita JAC dabiahachim ineba Kma aganaha.
“Mongolbar salo Academic Council-ni tom·aniko ong·atengon, apsan salon chinga JAC-ni tom·anikoba ong·atangskagen. Uni gimin JAC-ni pilak membor-rang, Meghalaya Tribal Teachers Association aro NEHU-ni Research Scholars Forum-koba ia tom·anio bak ra·echina mol·molatenga,” ine JAC-ni chairman parakataha.
