U·IATTIMGIPAONI
TURA: Garo Hills-o nosto ong·gipa ramarangko paver block-rangchi taridapengani a·sel ramarang namdapani pal batesa namjabatatako man·enga ine dingtang dingtang dolrang aro jolo songdongenggipa manderang matnangattokaha.
Koborko on·ani gitade, NH-51, AMPT rama aro Garobadha-Dalu-ni nosto ong·gipa ramarangko paver block-rangchi taridapahachim indiba ia ramarang namdapani pal batesa namjabatatako man·e re·ruraenggipa manderang neng·nikanirangko chagrongna nangtokengachim.
Taridapgipa ramani bak gita gari gorarang re·ruraahani a·sel ia ramani obostarang namjabataha ine jolo songdongenggipa manderang parakataha.
“Ramako tarian namjahama ma paver block-ko on·e tariani a·selan ong·ahama chinga ma·sija indiba paver block angipa ramarang apsan ong·jae re·ruraanirango namen neng·nikanirangko man·enga. Ian ramako namdapatani pal batesa namjabatatenga,” ine Phulbari jolo songsalna kamko ka·gipa Peter Sangma parakataha.
Paver block-rangchi rama tarianio koros komibatani giminsa PWD, nosto ong·gipa ramarangko paver block-rangchi taridapengachimkon ineba ua aganaha.
Nosto ong·gipa ramarangko paver block-chi taridapanio contractor aro department-de namgnirangko man·enga indiba ramako salanti re·ruraenggipa manderangsa neng·nikanirangkode chagrongna nangtokenga ineba ua aganaha.
Je ramarangon paver block-rangko on·e taridapahachim, uandakgipa ramarango a·kolrangko ong·katate garirangko nosto ka·enga ine Old Bhaitbari songni saksa parakatskaaha.
“Paver block-rangara wilwilao donggipa ramana bate rakbatani gimin garirang re·dapahaode a·ningchi naproroangenga aro uandaken rama apsan ong·jaengaha aro a·kolrara dakatengaha. Ia ramarang a·kolrara dakengani a·selan chingni garirang nosto ka·ako man·tokenga,” ine ua aganaha.
AMPT ramao, cement block-rangko Rajabala aro Chibinang-ni gisepo donggipa bang·bata ramarangon on·aha aro iani a·sel re·ruragiparang neng·nikanirangko chagrongna nangtokenga ine kobor on·timgiparang u·iataha.
