U·IATTIMGIPAONI
SHILLONG: Meghalaya a·doko 108 emergency ambulance service-ko chalaina gita company-ko seokanio sorkari mikkang nitea ine matnanganirangko a·dokni Health Minister Ampareen Lyngdoh raken jegalataha.
“Manderangni janggiko jokatnagipa 108 service-kosa chinga a·dokona ra·bagen ine a·bachengonin aganmanaha aro 108 service-ko chalaina gita dakkienggipa company-rangna chinga maming dakeba mikkang niteani dongjawa ine anga ku·rachakanirangko on·na ska,” ine Lyngdoh aganaha.
Company-rangko baseanio maming dongnuani grigipa niamrangan donga ine talataniko on·angengon, 108 service-ko chalaina dakkienggipa company-rangna chu·gimik niamrangko mesoke on·manaha aro NHM-ni website-oba mark-rangko mesokmanahani gimin darangnaba mikkang niteani cholrang dongja ine Health Minister parakataha.
“108 service-ko chalaina dakkienggipa dolrangni gisepo bilaken susagrikanirang ong·enga aro angni chanchiani gitade, nambatgipa company-an a·doko 108 service-ko chalaina gita seokako man·gen,” ine Lyngdoh aganaha.
108 service-o kam ka·enggipa manderangko sorkari man·a dipet kamon donangkuna miksongenga ine janapatengon, je company-an a·doko 108 service-ko chalaina re·bagenchim, ua company kam ka·giparangna pilak man·na nanganirangko on·china sorkari nangnikenga ine Lyngdoh parakataha.
Gitcham company-chi chalaigipa 108 service-o kam ka·giparangkon da·o gital company-chi chalaina sienggipa 108 service-oba rakkipiltaigenma ine sing·anina aganchakaniko on·angskaengon, kam ka·giparangna dingtangmancha porikkarang donggen aro uamang kamna kragiparang ong·ode kamko ka·angkuna chol ong·aigen ine Health Minister parakataha.
108 service-ko joltangni company-rangchin chalaina nanga ine dabienggipani gimin janapatengon, batanggimin bilsioba tender on·ani somoio mitam company-rang baksasan agangrikna cholrangko man·aiahani gimin bang·en dakgualanirangko nikna man·aha ine Lyngdoh aganaha.
“Uni gimin an·ching joltangni manderangba skie ra·na nanganirang bang·en dongkuenga aro 108 service-ko chalaigipa company a·songni je bakoniba ong·china a·dokni manderangna name dangdike on·na man·nasa nanga,” ine ua aganaha.