U·IATTIMGIPAONI
SHILLONG: Meghalaya a·doko 108 emergency service-ko chalaina gita sorkari, company-rangko seokengon, a·doko 108 service-ko chalaina gita dakkigipa dolgni company-rang, dongimin niamrangko pe·aha ine National Health Mission (NHM)-ni Mission Director-na badi ka·e sedoatskaaha.
NHM-ni Mission Director-na badi ka·e sedoatani gitade, 108 service-ko chalaina dakkigipa affidavit-o darang company-an gipin company-rang baksa bak ong·gipa ong·na nangjawa ine CVC aro RFP-ni dongimin niamrangon janapani gnangchim indiba Medulance & Kubera Transport Solutions (Rakshak) dolgni company-rangan Delhi-ni Centralised Accident & Trauma Services (CATS) baksa Delhi sorkarini project-o apsan kamko ka·rimgiparang ong·skaengachim.
Bilsisana skang, CATS company-ni Medulance company-na on·gipa kamko da·o Kubera (Rakshak) sub-contract-na ka·skaenga ineba NHM-ni Director-na sedoatgipa chittio matnangataha.
“108 service-ko chalaina dakkigipa company dolgnian CATS-ni work order baksa apsan daken kam ka·gimin ong·a ine a·kangaha. Uni gimin ia dolgni company-rangan da·o 108 service-ko chalaina dakkianio chu·sokgipa ong·jahani gimin nanga gita ja·kuko de·china chinga nang·ko mol·molenga,” ine NHM-ni Director-ba badi ka·e sedoatgipa chittio janapataha.
Iani bidingo aganchakaniko on·angskaengon, uamang iani bidingo talataniko on·china CATS-ko didiataha aro da·o uamangni aganchakanina sengkuenga ine NHM-ni Mission Director Ramkumar S parakatskaaha.
Indake ong·engon, NHM baksa songgigrikaniko Meghalaya sorkari den·galpila ine agananiko EMRI Green Services-ba raken jegalatskaaha. Iani bidingo talataniko on·angengon, Meghalaya sorkarini NHM baksa songgigrikani 2022 bilsini June 30 tarikon bon·ahani giminsa EMRI GHS-ni contract-ko bon·ataha aro Meghalaya sorkari da·o gital dake tender-ko on·piltaiaha ine EMRI GHS parakataha.