U·IATTIMGIPAONI
SHILLONG: Re·baenggipa 2024 bilsini Lok Sabha election-o susana gita National People’s Party (NPP)-ni candidate-rangko December jao parakna gita sienga.
Iani bidingo kobor ra·timgiparangna talataniko on·angengon, Meghalaya a·dokni damgni Lok Sabha seat-rangna NPP-ni candidate-rangko December jao parakatgen ine Budbar salo, NPP-ni gital state president Prestone Tynsong parakataha.
Mongolbar salo Tynsong, NPP-ni gital state president ong·e kamko jako ra·rikahachim ine nikna man·a.
“Lok Sabha election-o susana gita chinga kamrangko a·bachengaha aro bang·a manderangan NPP-ni tikitna chingo dorgastorangko galaha. Anga da·omangmangsa state president-ni kamko jako ra·ahani gimin adita somoirangko nangkugen indiba candidate-rangni bimingko chinga December jaode tik ka·na man·gnok,” ine Tynsong aganaha.
Meghalaya a·doko damgni Lok Sabha seat-rang donga aro ianoni Tura seat-ko Meghalaya a·dokni Chief Minister Conrad K Sangma-ni nogipa Agatha K Sangma aro Shillong Lok Sabha seat-ko Congress dolni Vincent Pala cheenba da·o dipet MP ong·kuengachim.
Tura Lok Sabha seat-na da·o ong·enggipa MP Agatha K Sangma-kon NPP-ni candidate-na seoktaigenma ine sing·on, “NPP-ni niam bidiko, sitting MP-na aro gipin namgipa candidate-rangnaba tikitko dabina cholrang donga. Uni gimin mai ong·a ukode ja·manosa ma·sigen,” ine a·dokni Deputy Chief Minister aro NPP-ni state president parakataha.
State president ong·e uni skanggipa daitoara mai ong·gen ine sing·anina aganchakaniko on·angskaengon, block level-oni a·bachenge NPP-ni dingtang dingtang committee-rangko nipiltaianian uni kam ong·gen ine Tynsong parakataha.
“Election-o susana gita nambate tarisamsonade onbatgipa gadangaonin name tarisamsona nanga,” ine ua aganaha.