U·IATTIMGIPAONI
TURA: Indian Constitution-ni Eighth Schedule-o napatchina dabienggipa ming 38 ku·sikrango A·chikkuko watchanggalahani gimin Garo Graduates Union (GGU)-ba suk ong·gijaniko parakataha aro A·chikkukoba Eighth Schedule-o napatchina gita a·songni Union Home Minister Amit Shah-na sedoataha.
Indian Constitution-ni Eighth Schedule-o napatchina dabienggipa ming 38 ku·sikrango A·chikkuko watchanggalahani gimin suk ong·gijaniko parakatengon, Meghalaya a·dokni Khasi aro Garo ku·sikrangko Constitution-ni Eighth Schedule-o napatchina gita 2018 bilsini November 27 tarikon Meghalaya Legislative Assembly-o resolution-koba ra·aha aro A·chikkuko Eighth Schedule-o napatchina dabianiara skang somoirangonin A·chikrangni dabiani ong·achim ine GGU-ni dilgiparang talataniko on·angaha.
“Meghalaya a·doko Garorangba mongsonggipa jatrangoni jatsa ong·a aro Meghalaya a·doko songdongenggipa manderangoni 33 percent-de A·chikkuko agangiparangan ong·a. A·chikkuara Meghalaya a·doko songdongenggipa A·chikrangni jakkalgipa ku·siksan ong·aija indiba salgro salaramni gipin a·dokrango, West Bengal-o aro Bangladesh a·songo songdongenggipa A·chik manderangni jakkalgipa ku·sikba ong·a,” ine Union Home Minister-na sedoatgipa chittio, GGU-ni dilgiparang parakataha.
Garo subject-ko primary gadangoni university-ona kingkingan skie on·enga ine janapatskaengon, Garo ku·sikko doctorate degree-naba chatro chatrirang jakkalenga aro bang·a chatro chatrirangan Garo subject-ko honours-ba dakenga ine GGU parakataha.
Eighth Schedule-o napatna gita Home Affairs Ministry-ni u·iatgipa ming 38 ku·sikrangara, Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar/Gujjari, Ho, Kachachhi, Kamtapuri, Karbi, Khasi, Kodava (Coorg), Kokborok, Kumaoni (Pahari), Kurak, Kurmali, Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri/Kosali, Shaurseni (Prakrit), Siraiki, Tenyidi aro Tulu ku·sikrang ong·achim.
Eighth Schedule-o da·o dipet ming 22 ku·sikrang donga aro uarangara Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu aro Urdu ku·sikrang ong·skaengachim.
Indake ong·engon, Eighth Schedule-o napatna ma·mong sorkarini tik ka·gimin ku·sikrango A·chikkukoba chapatchina GGU, Union Home Minister Amit Shah-ko didiataha.