U·IATTIMGIPAONI
SHILLONG: Meghalaya a·dok ning·o niam gri chalaienggipa pilak toll aro check gate-rangkon chipatchina gita a·dok sorkari changni chang ge·etanirangko on·engoba, a·jatangtango niam gri chalaienggipa toll gate-rangko chipna man·jaengani gimin Budbar salo, United Democratic Party (UDP), a·dokni autonomous district council (ADC)-rangko sing·doataha.
“Ia toll gate-rangara niam gri chalaienggiparangsa ong·genchimode aro district council-ni ning·o ga·akgiparangsa ong·genchimode iarangko nie dongna nangjachim. Ia niam gri chalaienggipa toll gate-rangko chipatchina gita changni chang sorkarian u·iatanirangko on·ahachim indiba iarangni kosako maming ja·kurangko de·janiara a·dokna namen nitogijaniko ong·atenga. Sorkarini ge·etaniko maikai ADC-rang manigija dakna man·a?” ine UDP-ni general secretary Jemino Mawthoh sing·doataha.
A·doko niam gri chalaienggipa pilak toll gate-rangkon chipattokchina UDP nangnikenga ine janapatengon, iani bidingo district administration-ni gita chitti seachi u·iatahani gimin Mawthoh, an·tangni kusi ong·aniko parakataha.
East Khasi Hills a·jani ramarango niam gri toll ba check gate-rangko kulie, garirangoniko kajina gile ra·aniko district administration champengatmanahachim ine nikna man·a.
Batanggimin jarango iandake niam gri chalaienggipa toll ba check gate-rangko chipatahani gimin ua dingtangmancha a·dok sorkari aro district administration-koba mittelpilangaha.
Niam gri chalaienggipa toll gate-rangni bidingo adita salrangna skangsan UDP-ni dilgipa aro KHADC CEM-ni gisepo adita jera ra·grikanirangko nikna man·ahachim.