U·IATTIMGIPAONI
SHILLONG: A·dokni damgittam district council poll-rango NPP an·tangari susaaigen ine mnisalo parakataha.
NPP, VPP dakgipa political dolni ra·bianirangna jajrenggijaniko parakaha. “VPP, mitam cosntituency-rango uamangni candidate-rangko susaatgenchimoba, chingni kosako bang·bata seat-rangon susaseknagipade UDP aro Congress-san ong·aigen,” ine KHADC MDC aro NPP spokesperson Bajop Pyngrope Sukrobaro aganaha.
“Party-ko re·dilna changgipa saksa dilgipa Prestone Tynsong-ko chinga mija mangmango party president songaha aro da·o chinga chingni dakgnirangko a·bachenggnok aroba MDC election-rango nambate dakna man·na gita tom·anirangko ong·ate chanchirimanggen,” ua aganaha.
Badiaba political party-rang baksa bakrimgenba ine sing·on, ‘‘chinga an·tangtangari susaaigen, maina pre-poll alliance-ko dakani bidingo maming agangrikani dongja,” Pyngrope aganaha.
Indake ong·genchimoba “Ian party dilgiparango pangchakgen indiba da·o dipetode maming golpoanirang dongja, unigimin an·tangtangari susagen” ineba ua aganaha.
Da·o dipetode, a·dokni gimik damgittam autonomous district council-rangon executive committee-ko rikenga.
