U·IATTIMGIPAONI
SHILLONG: Meghalaya a·doko 108 ambulance service-ko chalaina gita dakkianio niamrangko ja·rikjaenga ine matnanganirangko knasona man·engon, gital company-ko seokanio sorkari pilak niamrangkon ja·rikenga ine Robibar salo, a·dokni Health Minister Ampareen Lyngdoh a·kangatskaaha.
108 ambulance service-ko chalaina gita da·o dipet dakkiani kamrang matchotsrangkujaenga ine janapatengon, iani bidingo skatang matnanganirangko dakjachina Lyngdoh, dingtang dingtang dolrangko didiataha.
Indake ong·engon, a·doko 108 ambulance service-ko chalaina dakkienggipa company-rangoni dolsa, Meghalaya a·doko ambulance-rangko 5G baksa chatna gita miksongenga aro ian skanggipa ong·e, manderangni janggirangko jokatna kam ka·anio dingtanganiko ra·bana man·gnok ine parakataha.
Koborko on·ani gitade, batanggimin bilsi gittamna ia jolrango kamko ka·e aro Public Sector Undertaking (PSU) baksana uamango kam ka·giparang baksa bakrimgipa ong·e Medulance company-ara, Meghalaya a·dokni manderang baksaba nangrimgipa ong·aha.
“EDNA Entreprise baksa kamko ka·rime, GVK EMRI-ni watangani ja·man sorkarini neng·nikan somoirango EDNA Entreprise-ba ambulance-rangko chalaianio bang·en dakchakanirangko on·aha aro da·oba dakchakengkua,” ine kobor on·timgiparang parakataha.
“Medulance-ni nisanara a·dok gimikna 5G chatgipa ambulance-rangko aro GPS man·gipa ambulance-rangko on·anian ong·enga. Ian Meghalaya a·doko manderangni janggiko jokatna kam ka·anio ambulance-rangni kamko nambatatani ong·gnok. Da·o dipet chinga Meghalaya a·dokko 5G smart ambulance man·chenggipa a·dok ong·atna niksamsoe kamko ka·enga,” ine Medulance Healthcare-ni Co-Founder Pranav Bajaj parakataha.
