U·IATTIMGIPAONI
SHILLONG: North Eastern Hill University (NEHU)-o Rohit Prasad-ko niam grisa technical officer-ni kamna ra·aha ine dingtang dingtang dolrangni nangrime bikotgipa Joint Action Committee (JAC) matnangenba, uko kamoniko ra·galpilchina dabitokengon, NEHU-ni technical officer-ko niamo pangchakesa kamo ra·aha ine NEHU-ni Vice Chancellor Prabha Shankar Shukla a·kangatskaenba, North Eastern Hill University Teachers Association (NEHUTA)-ni petchal ka·ana ua maming dakeba bame on·jawa ine parakataha.
“Ong·gija ja·kuko de·chinasa NEHUTA angko petchal ka·enga indiba anga uko dakna man·jawa,” ine press conference-ko ong·atanio Prof Shukla aganaha.
NEHU-ni niam retirangko jinmana poraiatengon, “NEHU-o kamko ka·ena skang Rohit Prasad, IIT Roorkee-ni Technical adviser ong·achim. Uni giminsa NEHU-ni VC, uko contractual basis-o NEHU-ni technical adviser songaha,” ine Prof Shukla parakataha.
Niamo pangchake, B group-ni pilak kamrangkon permanent-na aro A group-ni pilak kamrangkon, temporary-na songna VC-o bil donga ine talataniko on·angengon, group A-ni ning·osa Rohit Prasad-koba technical officer songaha ine NEHU-ni VC parakataha.
Rohit, uni apsan biaponi ba apsan jatoniba ong·ja ine janapatengon, Rohit Prasad-ko ua kamni gimin u·i-ma·sigipa ong·ani giminsa aro IIT Roorkie-o kam ka·gimin ong·ani giminsa ia kamna ra·aha ine Prof Shukla aganaha.
NEHU-ni technical officer-ko kamo ra·aniara ua saksanni rai ong·ja indiba Executive Council-ni raiba ong·a ineba VC parakataha.
Mainiba a·selrangsa ma·sisretgrikanirang ong·engakon ine an·tangni suk ong·gijaniko parakatengon, iani bidingo apsan asonge agangrikna man·na gita NEHUTA-ko uona re·bachina gita Prof Shukla didiataha.
