U·IATTIMGIPAONI
SHILLONG: Meghalaya a·dokni dingtang dingtang civil hospital aro district hospital-rango kam ka·anirangko nipilna gita Sombar salo, a·dokni Chief Minister Conrad K Sangma aro Health Minister Ampareen Lyngdoh-ni dilanichi, dingtangmancha tom·aniko ong·atangaha.
Ia sorkari hospital-rango kam ka·ani bewalrangko namdapatna gita ia tom·anio sorkari chanchirimangaha.
Tom·a matchotani ja·man kobor ra·timgipa manderang baksa agangrikengon, ia hospital-rango mongsongbate nangchongmotenggiparangara kam ka·giparangan ong·enga aro ia hospital-rango nurse-rang, paramedical staff, specialist-rang aro doctor-rang chu·ongjaengani gimin dingtangmancha Chief Minister-na talate on·angaha ine Sombar salo, a·dokni Health Minister Ampareen Lyngdoh parakataha.
A·dokni pilak hospital-rango kam ka·anirangko health department, nirokatna man·na gitasa ia hospital-rango kam ka·anirangko nipilangaha ine janapatengon, ia hospital-rango sanna bananirangko aro dingtang dingtang kamrangko namdapatna gita cholrangko nina aro tangka paisani gita cholrang ong·ama ong·ja uko nipiltaina gita adita salrangni gisepon tom·aniko ong·attaigen ine Health Minister parakataha.
“Chinga ja 24-oni ja 34-mangni gita somoiko ra·enga aro ia somoirangni gisepo kamrangko namdapatna jotton ka·gen. Health worker-rang bang·batan chel·a biaprangosa kamrangko ka·na nangengani gimin iandakgipa manderangna chinga man·gnirangko bariatani giminba chanchienga,” ine Lyngdoh aganaha.
