NEW DELHI: Meghalaya a·doko bijoli chu·ongjaengani a·sel neng·nikanirangko chagrongna nangengani gimin Arunachal Pradesh aro Ladakh-na on·na gita Special Prime Minister’s Package-ko on·china, a·dokni Power Minister AT Mondal, ma·mong sorkariko didiataha.
Mongolbar salo, State power minister-rangni tom·aniko ong·atanio a·dokni Power Minister, jinmana aganprakengon, Arunachal Pradesh aro Ladakh-o gitan hydel power project-rangko bikotna cholrang bang·en donga ine Mondal aganaha.
Arunachal Pradesh a·doko Solar aro Small Hydro Power Project-rangchi songo noko bijoliko on·na gita ma·mong sorkari, PM’s Special Package-ni ning·o gong kror 550-mangni gita tangka paisarangko on·e dakchakahachim.
Indake ong·engon, Meghalaya a·doko bijoli on·aniko namdapatna gita a·dok sorkari, NTPC Limited baksa Memorandum of Understanding (MoU)-o soi ka·grikmanaha ineba Mondal aganaha.
Meghalaya a·doko bijoliko chu·onge on·na man·na gitasa ia project-o dakchakaniko on·china ua ma·mong sorkario dabienga ineba Power Minister aganaha.
Ia project-ko name chu·sokatna man·na gita ma·mong sorkari, tangka paisarang aro kamrangchiba dakchakaniko on·na nanga ine ua aganaha.
Salgro salaram jol gimikna Shillong-o Ad Research aro Development Institute-ko kulina nangenga ine janapatengon, salgro salaram a·dokrangara biapni gita aro climate-ni gitaba namen dingtanggrikani gimin ia institute-ko on·genchimode salgro salaram a·dokrangna bang·en dakchakani ong·gen ine Mondal parakataha.
2021 bilsio bon·gipa ‘RESCO’ Model-ni ning·o Off-Grid SPV Power Plant-rangko salgro salaram a·dokrango kulipiltaichina gitaba Power Minister didiataha.
Apsan daken, salgro salaram a·dokrango bon·atgimin renewable energy scheme-rangko a·bachengatpiltaichinaba ua ma·mong sorkariko didiataha.
Meghalaya a·doko Chief Minister’s Solar Mission-ko a·bachengataha ine talataniko on·angengon, Roof Top Scheme-rangna subsidy-ko gipin biaprangonaba sokatchina aro chonchongipa hydel project-rangna subsidy-rangko tangatpilchina gitaba Mondal didiataha.
