U·IATTIMGIPAONI
JOWAI: Garo Hills Autonomous District Council (GHADC)-o kam ka·enggipa manderang ja 30 batpile an·tangtangni dormaharangko man·tokkujaengon, Jaintia Hills Autonomous District Council (JHADC)-o kam ka·enggiparangba jaskuni dormaharangko man·tokkujaenga ine kobor on·aha.
JHADC-o kam ka·enggiparangna jaskuni dormaharangko on·kujaengani gimin re·anggipa Sombar salo, JHADC Staff Association (JHADCSA), office-ni a·palo chola gisimko gane aro nisan gisimko ra·e, an·tangtangni suk ong·gijaniko mesokangtokaha.
Koborko on·ani gitade, JHADC-o kam ka·enggipa manderangna dormaha on·gijani October jao jasku gapaha.
Iani bidingo JHADCSA-ni president Jonson Pohrmen, kobor ra·timgiparangna talate on·angengon, JHADC-o kam ka·enggiparangna jaskuni dormaharangko on·kujaengani a·sel uamang neng·nikanirangko chagrongna nangtokengahani gimin Sombar salo, kam ka·giparang nisan gisimko ra·e aro chola gisimko gane an·tangtangni suk ong·gijaniko mesoktokaha ine parakataha.
Indake ong·genchimoba, kam ka·giparangni jingjengatanio JHADC-ni dal·dalgipa official-rangde bakko on·pajahani gimin ua suk ong·gijaniko parakatskaaha.
JHADC-o kam ka·enggiparangna ta·raken dormaharangko on·jagenchimode, November 9 tarikoni a·bachengatenggipa session matchotani ja·man salgittamna jingjengatanirangko dakanggen ineba ua mikrakataniko on·angaha.
