U·IATTIMGIPAONI
SHILLONG: Songadam nokadamrangon pangchakanirang bilakani gimin re·baenggipa 2024 bilsio ong·atna sienggipa Lok Sabha aro District Council election-rangko Congress dol chena ka·dongenga ine Meghalaya Pradesh Congress Committee (MPCC)-ni working president aro KHADC-ni Deputy CEM PN Syiem parakataha.
Syiem-ni parakatani gitade, Lok Sabha aro District Council election-rango Congress dol chena man·aigen indiba ia election-na uamang rakbate kamrangko ka·na nangenga.
Re·baenggipa 2024 bilsion Lok Sabha election baksana KHADC aro JHADC election-koba ong·atengachim ine nikna man·a.
Shillong Parliamentary seat-na Congress dolni candidate-ko seokani bidingo janapatengon, uamang da·o ong·enggipa Shillong-ni MP aro MPCC-ni president Vincent H Pala-nan chakpaaniko on·enga maina ua da·o brigipa changna Shillong MP ong·na gita susana sienga ine MPCC-ni working president aganaha.
“Indake ong·genchimode chinga Congress party-ni gita party tikitko on·ani bidingo candidate-rangko basena nangaon ga·akenga. Indiba MPCC-ni president Pala-an da·o dipet MP ong·engani gimin unan tikitko on·ani cholrang dongbatenga,” ine Syiem aganaha.
Mikkang bilsini KHADC election-o ua Mawsynram constituency-oni susana miksonganirang dongja ineba Syiem parakataha.
“Bang·a manderangan angko Mawsynram-ona re·angpilchina nangniktokenga ine anga ma·sienga indiba 2019 bilsini election-o angko manderang seokahani gimin anga ia changoba Mawkhar-Pynthorumkhrah constituency-onin susana nangnikengkua,” ine ua aganaha.
Voice of the People’s Party (VPP)-ni bilakbaroroengani gimin sing·on, ua VPP-ni giminde mamingkoba aganna gita jechakskaaha.
KHNAM, PDM aro PDF gita dakgipa political dolrangni bon·anganiko ua an·tangan mikrontangchi nikmanaha ine Syiem aganskaaha.
