U·IATTIMGIPAONI
SHILLONG: North Eastern Hill University (NEHU)-ni senior technical advisor-na Rohit Prasad minggipa mandeko kamo ra·anio ua niamko ja·rikesa ra·aha ine adita salrangna skang NEHU-ni Vice Chancellor (VC) Prabha Shankar Shukla-ni a·kangataniko dingtang dingtang dolrangni nangrime bikotgipa Joint Action Committee (JAC) jegalatenba, uni agangipa kattarangara bi·sarangni agana gitasa aro tol·an gapa ine matnangatskaaha.
Rohit Prasad-ko niam grisa technical officer-ni kamna ra·aha ine NEHU-ni JAC matnangenba, uko kamoniko ra·galpilchina dabitokengon, NEHU-ni technical officer-ko niamo pangchakesa kamo ra·aha ine NEHU-ni Vice Chancellor Prabha Shankar Shukla a·kangatskaenba, North Eastern Hill University Teachers Association (NEHUTA)-ni petchal ka·ana ua maming dakeba bame on·jawa ine parakatahachim.
NEHU-ni niam retirangko poraiatengon, “NEHU-o kamko ka·ena skang Rohit Prasad, IIT Roorkee-ni Technical adviser ong·achim. Uni giminsa NEHU-ni VC, uko contractual basis-o NEHU-ni technical adviser songaha,” ine Prof Shukla parakatahachim.
Niamo pangchake, B group-ni pilak kamrangkon permanent-na aro A group-ni pilak kamrangkon, temporary-na songna VC-o bil donga ine talataniko on·angengon, group A-ni ning·osa Rohit Prasad-koba technical officer songaha ine NEHU-ni VC talataniko on·angahachim.
Indake ong·engon, Budbar salo JAC-ni press conference-ko ong·atangenba, VC-ni iandake a·kanggipa kattarangko jegalattokskaaha.
“Rohit Prasad-ko NEHU-ni VC maikai kamo ra·aha aro uko kamo ra·anio maikai ua niamko pe·aha chinga mingprakprakon che·em che·em dake talatna man·aigen,” ine JAC-ni chairman Prof Lakhon Kma parakataha.
Prof Kma-ni parakatani gitade, University Constitution-ni Statute 21 ning·o on·gimin niamo pangchake NEHU-ni Vice Chancellor, university-ni skigiparangna agre darangkoba an·tangari kamo ra·na gita bil dongjachim.
Prasad-ko NEHU-ni senior technical advisor songaniko Executive Council ra·chakaha ine agananichi NEHU-ni VC, manderangko cha·bokna jotton ka·aha ine janapatengon, uni ong·gija dakgipa kamrangko uamang bakan jinmana parakatgen ine JAC-ni chairman ka·mikkenataniko on·angaha.
NEHU VC-ni ia official-ko kamo ra·aniara UGC Model CRR (Cadre Recruitment Rules)-ko pe·ani gitaba ong·aha ineba Prof Kma parakataha.
