U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o Shillong Parliamentary seat-oni susaatna gita candidate-ko seokanio neng·nikaniko man·na nangenga ine jangbingbanganiko National People’s Party (NPP) jegalataha.
NPP-ni ku·wattimgipa aro a·dokni Cabinet Minister Marcuise N Marak-ni parakatani gitade, candidate-ko uamang pilakan apsan chanchirimenba, jinmani namnikakosa seokanggen.
“NPP-ara dingtang dingtang dilgiparangni bakrimgimin dolsa ong·ani gimin jegrikani aro an·tangtangni chanchianirangko agananide dongaigen,” ine ua aganaha.
Jinma maiba kamni gimin chanchirimengon pangnan an·tangtangni chanchianirangkoba aganchengna nanga aro da·o NPP-ni dilgiparangba apsan daken, candidate-ko seokani bidingo chanchienga ineba Marak aganaha.
Re·baenggipa bilsini Lok Sabha election-o Shillong Parliamentary seat-oni susana gita Mawhati-ni gitcham MLA Daskhiatbha Lamare-na NPP-ni tikitko on·china a·doko mingsinggipa Dhar Group, dabienga ine koborrangko on·ahachim. Ia Dhar Group-na komibeoba sakdok ba saksni MLA-rang dakchakanirangko on·skaengachim.
Indake ong·engon, da·o dipet NPP-ni tikitko on·ani bidingo chanchia dongkujani gimin candidate-ko seokanio jajaani kattaba dongja ine NPP-ni ku·wattimgipa Marcuise Marak, talataniko on·angskaaha.
“Je mandekon manderang ra·chakgen, uandakgipa candidate-kosa chinga seokgen. Candidate-ko seokanio chinga maming neng·nikanirangko man·ani katta dongja,” ine ua aganaha.
Shillong Parliamentary seat-na dorgasto galenggipa candidate-rangni gimin janapatengon, “Da·o dipet badita sak donga ukode anga name ma·sikuja indiba chingo da·o Hima Shangpliang-ba donga indiba Dasakhiat-na tikitko on·ani giminde anga da·osa ma·sienga. Indake ong·genchimoba chinga party-ni gita name chanchiesa ja·kuko de·gen aro iani bidingo chinga na·simangnaba u·iatgen,” ine Marak aganaha.
