U·IATTIMGIPAONI
SHILLONG: Meghalaya a·dokni chatro chatrirangba a·songni gipin biaprango poraienggipa chatro chatrirang baksa apsan gadango ong·pana gita da·o mikkang salrangode Meghalaya Board of School Education (MBOSE)-o gital text book-rang baksa gital curriculum-ko a·bachenggnok aro copyright-na sorkari da·o proposal-ko on·manahani gimin text book-rangko NCERT text book-rang gitan MBOSE, gital dake nipiltaienba chapa ka·gnok ine Sukrobar salo, a·dokni Education Minister Rakkam A Sangma parakataha.
“Da·o dipet national standard-ni curriculum gita ra·bana Text Book Review Committee, proposal-ko on·manaha aro Mathematics, Science, English aro Social Science subject-rangna text book-rangko NCERT text book gita tarina ia committee, ku·pattianiko on·manaha,” ine Sangma aganaha.
Iani bidingo a·dokni Cabinet, re·baenggipa November 16 tariko tom·e chanchirimangenba, chatro chatrirangni namgnina ja·kuko de·anggen ineba Education Minister parakataha.
“Dingtang dingtang competitive porikkarango aro kamna porikka seatanirango chinga chatro chatrirangko national level-o gitan name dakaniko nangnikengani giminsa curriculum aro syllabus-ni gadangkoba tang·doatna nangnikenga,” ine Sangma aganaha.